انگار

1. انگار وَ تُوو اُفتاسمه
   ##
   ای لَت و او لَت ایروی انگار ودینت بِهسِنه
   پَهلی و پَهلی خُرد و پَر انگار وَ کوه اُفتاسِمه
   ،،
   پُرسون و پُرسون ایگرُم از حال و روزت خُم خَور
   گیجُم و منگُم شَو و روز انگار کَلُو اُفتاسمه
   ،،
   هر چی ایخَری باز گُسنَتِه انگار و غَور وَهرَسیی
   انگار وَ سِرکو کُفته یَم چارتَه دو لُو اُفتاسمه
   ،،
   شَو نِسپِ شَو خَو نیبُرم مِن خَو تَپُو وِل نیکِنه
   انگار وَ کُم لرز بُردمِه مِن لای پتو اُفتاسمه
   ،،
   زِر چاکِ جُومَت دِردَه بِی سَر گُوکَلِت اُفتا وَتا
   سَر دَرزِ جُومَت دَهس بنه انگار پَرو اُفتاسمه
   ،،
   هر کِی کِه وَت ایگُو چِتِه چُت تِلفَنادِی مِن تییَش
   از بس کِه چُت ره مِن تییَم انگار وَ چُو اُفتاسمه
   ،،
   مِن بالِ بُشمَت چالمِه مِن بالِ چالَت جامَه بُو
   کَس تَیم نیا تَیم نیرَوِه بِی رَه وُ رُو اُفتاسمه
   ،،
   هَم بَهسَه یَم هَم بِهسَه یَم چِی بَرد مِن شُل بِهسَه یَم
   وَیبال و اوبالُم مزن سَر بَهسَکو اُفتاسمه
   ،،
   چپ ایزنی راس ایرَوی تو قیمَه مِن ماس ایکنی
   تو شیت وَ تَه راس نیکشی مُو بَی دُرو اُفتاسمه
   ،،
   شَق مِن سَرُم ویسادیی هرچی ایکنی جُم نیخَرُم
   شَرم واو خدا کن نیتَرُم انگار وَ توو اُفتاسمه
   ،،
   آهای خدای بالی سری حاکم تِنی حُکمت چِنه
   هر کِی نه تَک وَش دادیی خُم بَی دُولُو اُفتاسمه
   ،،
   بعضی نَه بِهسِی مِن لَتَه بعضی گِرُهتِن سَر غَچَه
   خُت مِن هَچَل اُفتادیی خُم سَر کِرو اُفتاسمه
   ،،
   پَه نَی چِتِه بین ایکِنی مَه تَهم و تُو اُفتاسیَی
   ایطَو کِه ایبینُم خُم هَم مِث خُت وَ تُوو اُفتاسمه
   ،،