نوزین چمیش
نوزین
،،،،، ،،،،،
شَو و رُو وابی چَواس
سیم دَ نَهلِشتِه حَواس
پُشتِ لَو خَط بِهسِه سِه
زیرِ گوش آ شیش پِلاس
تِیَلِش چِی چَلپِ خون
پِلکَلِش چِی تاسِ ماس
بُرگَلِش سُک نیزَنِه
زُلفَلِش رَهتِن وَ داس
شالَه بِهس سَر کُولِ چَپ
مِی نَه آوِه سَمتِ راس
پانَه تُند ورداشت وُ رَه
بعدَ خُش نَونُم چِه باس
…
پَهلَلِش چِی اَو وِنوس
تُورَه پُوشی چِی عَروس
زِر بِتِش سیزَن طلا
سَر گِلپ سُرخِه وَ بُوس
واو تِیه ی کالِش کشید
سیرمه تا زِر هَر دو لُوس
اَنجَنام بَی کاردِ کُل
کُفتِمِه مِن هَهس و پُوس
نا مسلمون خنده شَم
دُشمنه اِیکه وَ دوس
چِی خیارِ شوشتری
بَعدَ خُش دِل خَرده کُوس
…
بِرچَه بِرچ اِیکرد اَلاش
میخک و مِهلو وَناش
لَویلِش چِی بَلگِ بید
اَو دِیاره مِن هِناش
لُولِ برنو هیکلِش
زَنگِ ناقوسِه صِیاش
دَهس وَ سَر کِرده مِنه
دل خُمه بُرده رِیاش
سیل وَ دینداش اِیکنم
آیرووم قُربون خُداش
بعدَ خُم جاش نیگره
بعدَ خُش پیدایه جاش
…
دوره وابی گَندَه پیش
بندِ کاردُم خُم وَسیش
بَی تووَر مِرزِنگَلِش
دلمه کِرده چِل پِلیش
قُرصِ سَر درده وَسیم
یَه تِلیش و او رو سَریش
وَر گِرو سَر کِه فرار
تَهرِه نوزینِ چمیش
آرزو دارم یَه شَو
سر بِنُم هیبَی گِلیش
بعدَ خُش ماتُم هَنِی
بعدَ خُش نیرَم وَ کیش