قالب شعر: چهار پاره

برزو و تمرزو
××××××
شَووَل راسِه هَمَش بُنگ پلنگ رِهتِه مِن اِی خُنگ
هَمَش اَنگ وُ هَمَش اُنگ تِفنگ تَنگ وُ فِشَنگ رُنگ
چُپُون لَنگ وُ سَگَل لُنگ حَیونِ کور و کَر و گُنگ
هَمَش دور تَشَ و تُنگ دوور جاهِل وُ کُر جُنگ
،،
قضا زَد وُ بَوآ مُرد غَضَب اُومَه وَ اِی وُرد
هوا سَرد وُ زمین سُرد دوور لِیز وَ کُم ایبُرد
یَه سَیلی وَ چَپَر کِرد دِلِ کُر وَچَمَش بُرد
یَواش هَی زِر لَو گُفت خُدا گَردَنِ خُم خُرد
،،
حَقَش چِفت وُ پَسَر خِفت مِچَل تا زِر چِل لُخت
سَر ِلَونَه تَتو زَه دو تا بُرگَه نَها جُفت
مِیَل زَرد و تِیَل سَوز گِلُپ چِی تِپِ خین سُرخ
فَکَه زاویَه وَش دا قَلاب بِهس وَ سِمَی نُفت
،،
دوور نُومَه عَوَض کِه تَمُرزو شُده مَهدُخت
وَریسا و نِهیب دا گَمونُم نَکنِه اُخت
کُچُک مُفت بِجِشک مُفت زَه چِشمَک وَ دوور کُر
خَفَت خَرد وُ خَفَت بُرد دِلُم سِی کِرَکُو سُخت
،،
نَه خَرزا وُ نَه خُرزو وَراوِه دِلَه اُرزو
یَه بَندی وَ خِرِش بِهس وَ دار زَه خِشَه بُرزو
گُرازَی تَشِ عِشقِش کَشِی سُو وَ سَرِ سُو
وَ داغِ گَپ مَردُم خِشَم کُشتِه تَمُرزو
،،
صِیَی لیکَه بُلندِه و ای مال و او مال
کَلا جُومَه یِ سِه کِه غَذا رَه وَ تِیَی دال
غُروس خُون کِه شَفَق زَه پلنگ زَد مِنِ مَندال
و روزی کِه بَوآ رَه تَش افتادِه وَ اَنجال