قالب شعر: چهار پاره
کیم بیلیر کیمسه‌نین کؤنلونده نه وار
گوز یاشی اوره‌یین دولماغیندان‌دیر
بیلمیرم بلکه‌ده بو آغلاماغلار
ائله او آخشامین اولماغیندان‌دیر
قصیدجه وورورسان باش بارماغینی
اوره‌ک شوشه‌سی‌نین پارالارینا
داملایا داملایا دوزو تؤکورسن
کؤنلومون گونده‌کی یارالارینا
بئلنچی دوشوبسن کوچه به کوچه
خئیراتین سپیرسن هریانا آیدین
یاغیش جنابلاری سؤیله دئ گؤروک
او گون گون‌اورتا چاغ به هایاندایدین
ائلئیکی باشلاندی سون گونو دؤیوش
سوسوزلوق کؤلگه‌سی آیا چاتیردی
هر یانا باخیردین چؤل ایلغیم‌لاری
گؤزلره یانلیشین اوخون آتیردی
زهرانین دئییل‌دین کبینی مگر
اونلا شؤهرتینی دونیایا یایدین
یاغیش جنابلاری سؤیله دئ گؤروک
او گون گون‌اورتا چاغ به هایاندایدین
سوت‌دن دانیشماغا آچمادی آغیز
قولون دیرسگله‌دی بالیش یئرینه
او قده‌ر یوباتدین بیر دامجی سویو
اوخ یاغدی یئر گؤی‌دن یاغیش یئرینه
روبابین احوالین سن اؤزون گؤردون
بیر به بیر دردلرین اوتوروب سایدین
یاغیش جنابلاری سؤیله دئ گؤروک
او گون گون‌اورتا چاغ به هایاندایدین
گئدنده او لحظه فراته ساری
قالاندی اوره‌ک‌ده غم اوسته غمیم
قیزیرقانماسایدین گون اورتا چاغی
نه بیلیم بلکه‌ده اؤلمزدی عمیم
سندن گؤزتلیردیک عشقیلن رحمت
وفا هاردا ایکن سن اویاندایدین
یاغیش جنابلاری سؤیله دئ گؤروک
او گون گون‌اورتا چاغ به هایاندایدین
کیم بیلیر کیمسه‌نین کؤنلونده نه وار
گوز یاشی اوره‌یین دولماغیندان‌دیر
بیلمیرم بلکه‌ده بو آغلاماغلار
ائله او آخشامین اولماغیندان‌دیر
✍: شاهید
۲۸ مردادماه ۱۴۰۰ (عاشورای ۱۴۴۳)