اولوم حقدور برادر فکرون ایله
یوزون توت الله ها اوز ذکرین ایله
قوشولما قارداشیم هر ره گذاره
مواظب اول عزیز دوشمه حصاره
اوگون که امر حقه اولدی مأمور
آدی شیطانیدور مأمور معذور
اونون شغلی بودور آلادماقیچون
بیرینه ال چالوب اویناتماقیچون
مواظب اول عزیز دوشمه کمنده
دوشوبدی چوخلاری سانسیز بنده
برینی آلادیب اوز سوزلرینن
بیر ی دوشدی کمنده گوزلرینن
بیرینی غرق ادور جاه و جلا له
گجه گوندوز دوشور فکر وخیاله .
دییر قوی ثروتیم هرگون چوخالسون
بودنیا ده آدیم هرگون اوجاِ لسون
آلار اونان تمام اختیاری
چکر ایش ایلدر مانند گاری
اوزونه خشلمز بیچاره بد بخت
خیال ایلر بودور.دنیاده خوشبخت
اولوب گتدی حاجی اموال قالدی
او زحمتلن اکن گلر سارالدی
توتوب وراث اونون قرخ گون عزاسین
چخادی هامی تندن اوز قراسین
هله باشلاندی تقسیم ماجراسی
یاتامیر قبریده راحت بابا سی
بیوک اوغلان گوتوردی کارخانانی
کیچیک اوغلان گلیب سویدی آنانی
باجی گلدی ولی اوز یولداشینان
اودا ایستر مالین چوخ گوز یاشینان
دیر الله بابام تز سولدی گتدی
غم وغصه اورکده دولدی گتدی
بوشعر عبرتی یازدی مرادی
بونون دا منزلی آخر اورادی
بیر عمری حیله ی بیر آشنایه
تمام یقدیقی گتدی فنایه
عزیزیم سعی اله سن اولما ساده .
بودل بازلار آلار سندن اراده
خلیل مرادی
