یایلاق سندی
بیر اوتلاقدا گزیردی نازلی ائششک
یئییب اوتدان اولوب بیر یاخشی دؤششک
بو اوتلاقدان کئچیردی بیرجه تولکو
بو دونیا ایچره یوخ بیر ذرره مولکو
باخیب حسرت چئکیب ائششک بودونا
دوشوب فیکره گئدیب قوردون یانینا
سلام اولسون سنه ای قورد قارداش
بو ایش ده گل منه سن اول، یولداش
قبول ائتدی سؤزون قورد اولدو یولداش
گلیبلر اولدولار ائششک له سیرداش
دئدی تولکو بو اوتلاق کی گزیرسن
تمامن اوتلاری بیر بیر یئییرسن
بورا مسند بیزیم کی دیر بیلیرسن
یئییب الوان بویاق اوت کئیف ائدیرسن
دئدی ائششک بورا چوخلو زاماندان
قالیب دیر بیزلره البت آتام دان
دئدی تولکو وارین اوندان نیشانین
اولا چوخ بیزلره واضح جوابین
یاخین گل باخگیلان بوردا قیچیمدا
یازیب خوش خط ایله بیر واقت بیچیندا
آلیب تولکو سؤزون تئز یان چکیلدی
سوادیم یوخ بویور سن گؤر نَجوردی
اَگیلدی قورد باخا یازغی یئرینه
ووروب بیردن تَپیک قوردون بئلینه
اوزاندی قورد یئره زارو پریشان
تؤکوب قان یاش اولوب احوالی گریان
دئدی تولکو منه ایمکان یوخ ایدی
سواد آلماق سنه ایمکان چوخ ایدی
سوادین چوخلوغو بوردا بیلیندی
منه یاردیم اولان یاغلی دیلیم دی