یازیرام شعریمی من ایلره یلدا گجه سی
شهرتین دوشدی گنه دیللره یلدا گجه سی
یری وار شکر ایلیک ایزد منانه هامی
نعمتین ایتدی عطا بیزلره یلدا گجه سی
رسمدور هامی گده جمله بیوکلر یانینا
شاد اولا عشق ایلیه گوللره یلدا گجه سی
قلبدن کینه لری هامی گرک پاک الیه
شادوخندان باخا لار دلبره يلدا گجه سی
استرن لذت دنیانی داداش درک اده سن
هامیسی جمع اولونوب بر یره يلدا گجه سی
حیف اولوب وضع زمان چوخلارینی تنگه سالوب
قاریشیب گوز یاشی دا سیللره یلدا گجه سی
باعثی هرکس اولوب تاپشرین اللاهه اونی
ظالمی تاپشیراریق یللره یلدا گجه سی
خلیلین شعری گلیب ایللریده شاد ایلیه
خاطراتین یازیری دفتره یلدا گجه سی
خلیل مرادی
