قاپ قارانليق‌دى شهر, يايغين ايشیق لار داريخير
اوستونو غم بوروموش, گؤى ياراشيق لار داريخير
وساواش ديرسا قيليج , كيمسه كى هاى_كوى سالاراق
بو بوزومتول دؤيوشه، آل باريشیق لار داريخير
بوردا ساز تـوزلو، قاوال چانتا دا ،چالمير بالابان
پينتى غم لر بورويوب شهرى ،آشيق لار داريخير
خيـاوان لار باغــيريـر دردلى شـهر آغلاياراق
كوچه لر دام يولولار دار _دولاشيق لار داريخير
مور بوياق، مورگو باخيش، غمله بولانميش بيرينه
بو يوموق فلسفه دن، تام دانيشیق لار داريخير
بوراخـيب كندى گـونش شـوقونا گـلمه بورا سن!
قاپ قارانليق دى شهر، يايغين ايشیق لار داريخير
بهزاد بیات فرد
____
