عاشېق
چال چۆڲۆرۆن، اۏخی، سسی سسه قات عاشېق
ياتمېش دلیلری يوخودان اۏيات
توستی باسېب چئنلی بئلی، دئ گؤرۆم
نئجهدور کۏر اۏغلی؟ هاردادور قيرآت؟
سنين چۆڲۆرا چالدېغېن زخمهلر
پرده- پرده اۆرهڲيمی تيتره دير
وجوديمی سنين تۏنانلې سسين
بير تک دۆشمۆش آغاج کيمی تيترهدير
سنين حرارتلې حزين سسينده
اۆرهک قانې گؤز ياشېنان قارېشېر
سن زخمه ووراندا قېزېل سارماشېق
سحر قانلې ديرکلره، سارېشېر
اۆرهڲيمن دردينی دينديريرن
غمه باتمېش ائو ائشيکدن دينده
خاطريمدن کُهنه تۏزی سيليرن
تۏزدا ياتمېش بۏش بئشيکدن دیينده
اصلی کرمدن اۏخوياندا، منی
دالدا قالمېش زامانلارا چکيرن
اليمدن ياپېشېب منی اؤزۆندن
يۏخی کيمی دۏمانلارا چکيرن
غليظ قارانتېنېن باغرې يارېلېر
آخېر سنين کسرلی آوازيندان
سن اۏخوران، من يازېرام، صبح اۏلور
ائله بيل گۆن چېخېر سنين سازېندان
1363- پاييز- كرج
