باهارا باخېش
گئنه گۆللنه جک قوری باغچالار
بزهنه جک گئنه گۆلدن طاقچالار
گؤرۆشه جک گئنه باهار، باغېنان
بارېشاجاق يئميشانلار داغېنان
گئنه نسيم
اسه جکدی سونبوللرين ساچېنا.
گئنه باغچا
بورونه جک ياشېل قيرميز پاچېنا.
گئنه زامان
دؤنه جکدی قارلې دؤنرگه لری
قوراجاقدې باغلارا يئتيشرکن
گۆل چيچکلی، بزهکلی جرگه لری.
گئنه قېش گئده جک، باهار گله جک
قۏجالمېش آغاجلار، جاوانلاشاجاق
گئنه قارلار اريه جک، گئنه ده
سئللر سولار، داغلان آشېلب داشاجاق.
گئچه جڲی گؤردۆک، بيلديکده، امّا
کيم بيليرکی نه اۏلاجاق گله جک
قېش گئده جک امّا گؤرن بيزلردن
ياز گلنده کيمين اۆزی گۆله جک؟
1370ين ديآيي- زنگان
