ائودن سیزه قاچدیم نه قدیر فاصیله واردیر
تا بلکه دئییم هر نه کؤنولده گیله واردیر
قارشیندا دایاندیم گؤرهسن گوزگو سایاق سن
باغریمدا کلان شهری ییخان زیلزیله واردیر
مین نقش یاراتدیم اورهیین فرشینین اوسته
باخ گؤر توخویان الده نجور حوصله واردیر
آرزیمدی اوچاق بلکه بو بایقوشلارین اوستن
گؤرسونله قانات چالماغا بیر چیلچیله واردیر
بیر یولدا عاغیلدان الین اوز عئشقینه ای باش
قوی حل ائده عالمده نجور مساله واردیر
شاهید دئمه عئشقین یولونو بیز باشا چاتدیق
عئشقین یولونو کئچمهگه مین مرحله واردیر
✍:شاهید