بایاتی ها
1-دوچرخه سی بالاجا میندی گئتدی گاراجا
ماشاللا منیم قاقام دیییلر گئدیر حاجا
***
2-بو باغدا بار اولونجا هئیوالار نار اولونجا
دیل آچار دلی گؤولوم سن منه یار اولونجا
***
3-توت آغاجی بویونجا توت ییمه دیم دویونجا
یاری خلوتده گؤردوم دانیشمادیم دویونجا
***
4-نارینجا باخ نارینجا درمه رم سارالینجا
آللاه منی اؤلدورمه آرزوم یئرین آلینجا
***
5-یاقیش یاغار دام لارا تؤکولر ایوان لارا
گوزل مامان قیزلاری وئریللر جاوان لارا
***
6-یالواردیم گئجه یارا آز ویر قلبیمه یارا
کاش اوزومه گوله سن باشیمی یارا-یارا
***
7-سو گلیر باشدان باشا تؤکولور داشدان داشا
آج قارینان داش باغلا گئتمه قونشویا آشا
***
8-آغ چارقاتین باغلاما گؤزون قوربان آغلاما
منیم سنه وفام یوخ سن منه بئل باغلاما
***
9-یولووا قویموشام خورما پادگاندا مأیوس دورما
سنی آن وئررم آللاها نیشانلی سربازی وورما
***
10-بولاغی بولاندیرما ال سالیب دولاندیرما
گئت سن ده تئز قاییت گل گؤزومو سولاندیرما
***
11-آی قیز دور گل یانیما قادان آلللام جانیما
من سندن ال چکئمه رم آند اولا ایمانیما
***
12-اوت دوشوبدو جانیما گلَن اولمور یانیما
قوربان ائدیم جانیمی او سورمه لی خانیما
***
13-توخورام فرشی،خانا اوره گیم دؤنوب قانا
ایلمه لر بوغدو منی دادیما چات آی آنا
***
14-آند ایچمیشم قورانا گئدم گؤزل اوغلانا
زر قدرین زرگر بیلر نه بیلر هر دیوانا؟
***
15-مینیب آتین آلاسینا سوروب شّهّر آراسینا
سیز آللا ماشاللا دییین آتامین بو بالاسینا
***
16-ویریلمیشام قاشینا گؤزلری نین یاشینا
باش گؤتوروب قاچارام اوجا داغ لار باشینا
***
17-آی گئتدی دام دالینا جانیم قوربان جانینا
الیمده یوخ اختیار گئدم اونون یانینا
***
18-نامه نین آغلیغینا سینه مین داغلیغینا
بو سوره نی اوخورام معلّم ساغلیغینا
***
19-بولاغین باشینا باخ دیبینین داشینا باخ
من سؤودوگوم گؤزه لین گؤزونه-قاشینا باخ
***
20-عاشیقام سازیما باخ یاندیران سؤزومه باخ
اوره گیم یارالاندی منده،سن دؤزومه باخ!
***
21-دام لار دالی قارانلیخ سولار گلیر بولانلیخ
قیزلار بیزی بئی(1) توتوب بیزده سوبای دولانیخ
***
22-دستمالین یودوم آپار ایتیرمه دوشمان تاپار
گئت مننن یاخچی تاپسان گل منی کنیز آپار
***
23-گئتمه منی ده آپار گئتسن قیامت قوپار
اوتوسام بیر آه چئکسم دالینجا سئل لر قوپار
***
24-سرباز گلیر قاتار-قاتار یورولار یول لاردا یاتار
باشین قوی دیزلریم اوسته تئل لرین تورپاغا باتار
***
25-قلم داشدا نه یازار سیزیللییار نه یازار
آتا بابا سؤزودور: دوز گئتمیین تئز ازار
***
26-آناسی یانار آغلار حریفی قانار آغلار
آنا دییر گؤورچین تابوتا قونار آغلار
***
27-قلبیمی اوخلادیلار گیز لینده ساخلادیلار
سنین کیمین گؤزلی کیمه آداخلادیلار
***
28-الیمده علمیم وار قیزیلدان(2) قلمیم وار
عزرائیل آلما جانیم(3) سفردن(4) گله نیم وار
***
29-منی گؤروب گولدی یار هر دردیمی بیلدی یار
آچیب گوللو دسمالین گؤز یاشیمی سیلدی یار
***
30-قلمدانیم قلم سیز آرامیم یوخدو سن سیز
یوخو حرامین اولسون نئجه یاتیران من سیز
***
31-صاندیق اوسته آغ لاواش خوش گلمیشن زن داداش
قاش قاباغین ساللاما ایندی گلر خان داداش
***
32-جان قارداش جانیم قارداش آغرییر جانیم قارداش
باش قویوم دیزین اوسته قوی چیخسین جانیم قارداش
***
33-پوتون لارین(5) یاغلارام اوستونه گول باغلارام
ایستیه سن گئج گلن دسمال چکیب(6)آغلارام
***
34-خنجریمی باغلارام دوشمان لاری داغلارام
یار یادیما دوشنده اوشاق کیمی آغلارام
***
35-یاریما اولسون سلام قوی کی دیییم بیر کلام
ایستی ییرم من سنی ایسته منی والسلام
***
36-من سنه چوخ بوشلویام اولماز سنی بوشلویام
ایناما سندن سورا بیرده بیر یار خوشلویام
***
37-قیزیل گولو بیچمیشم اوستونده آند ایچمیشم
مین گؤزه لین ایچیندن فقط سنی سئچمیشم
***
38-اؤلمه سم سیزه گللم سورمه چک گؤزه،گللم
یوز ایلده غوربت چئکسم قاییتسام سیزه گللم
***
39-داغ باشیندا سار منم قلبی قارا قار منم
دیییللر یار کوسوبدور بلکه گوناهکار منم
***
40-گؤلگه دن گونه دوشدوم باغلی دووونه دوشدوم
فلک اؤوون ییخیلسین سن دیین گونه دوشدوم
***
41-زنگاندا چوخ اولور اوزوم گیلله لیییم یولا دوزوم
دوملی قوللارین قوربان سن گلینجه نئجه دؤزوم
***
42-آدی یولا ساتمادیم شرفیمی آتمادیم
آمما گئجه آجیننان صبحه کیمین یاتمادیم
***
43-چیخدیم دام اوسته یاتدیم اوستومه پتو آتدم
دیدیلر یارین گلیر اؤزومو دامنان آتدیم
***
44-توکاندا سنگک آلدیم یاریسین یولدا سالدیم
اؤووم اوندا ییخیلدی یاردان اوزاخدا قالدیم
***
45-زنگان اوستو گؤی طاریم خوش گلدین منیم یاریم
قیزیلینان برابر گوموشونن بیر یاریم
***
46-داغ لار داغیمدی منیم غم اولاغیمدی منیم
دیندیرمه قان آغلارام یامان چاغیمدی منیم
***
47-قاپیمنان گئشمه منیم سویومنان ایشمه منیم
من بیر اوتدو قالاغام اوتومو دئشمه منیم
***
48- سو چیخار بولاخدان بال آخار دوداخدان
سن منیم گولومسن سلامیم وار اوزاخدان
***
49-اندیم گلدیم جاجیخدان یول سالدیم یونجالیخدان
گؤردوم یار اؤوده دؤیور هر نه سایدیم آجیخدان
***
50-آتلاندیم گئشدیم داشدان یاشماغیم دوشدو باشدان
محبّت یوخدو سنده گؤزوم قورودو یاشدان
***
51-بیر قوش گلیر آغاشدان خبر وئریر قارداشدان
قارداش دؤنسه باجیدان باجی دؤنمز قارداشدان
***
52-اوتاخدا گوللو یورغلان یاتیبدی سرباز اوغلان
تازه گلیپ حمله دن اونا باجیسی قوربان
***
53-دام اوسته یاتان اوغلان گؤینگی کاتان اوغلان
آداخلین الدّن گئدیر بی خبر یاتان اوغلان
***
54-گؤینگیم وار ایپکدن قارا بختم بَلَکدن(7)
اومودومو قیرمیشام دوز دیمیین فلکدن
***
55-بیر آه چئکسه م دردیندن داغ لار اوینار یئریندن
بیزی آیری سالانی آیری دوشسون ائلیندن
***
56-عزیزیم سؤزلریندن اومموشام گؤزلریندن
بیلسئیدیم آیریلیخ وار اؤپردیم گؤزلریندن
***
57-شَهَردن سن ، کتده سن هانسی ولایتده سن
من اؤلسم سنه قوربان سن اولمه غوربتده سن
***
58-بیر یارالی (8) قوچام من یئریم یوخدو قاچام من
قارین کی سیرفا دؤیور(9) هر گلنه آچام من
***
59-بالامی تانیرام من هر سؤزون قانیرام من
یوخودا آه چئکنده اوت توتوب یانیرام من
***
60-ایستیکانین داغ اولسون ایچ داماغین چاغ اولسون
دونیا مالین نئینیرن دوست لار جانی ساغ اولسون
***
61-بالام بایرامین اولسون قیزلار قوربانین اولسون
نه دن بئله چوخ یاتدین آنان قوربانین اولسون
***
62-قاش لارین اوخدو سنین کیپریگین چوخدو سنین
سنی چوخدان ایستیرم خبرین یوخدو سنین
***
63-قارادی قاشین سنین اون بئشدی یاشین سنین
همیشه حسرتده دیر یارین،یولداشین سنین
***
64-آپاردیلار گولومو ائله دیلر ظولومو
نه قویدولار دانیشام نه کسدیلر دیلیمی
***
65-خال ویرمیشان خال اوسته زولفو تؤکمه شال اوسته
سؤز دیدین،اوره ک آلدین شربت تؤکدون بال اوسته
***
66-سوگلدی دولدو بنده آخدی تؤکولدو کنده
اوره گیمه اوت دوشدو یار بوینونو ائینده
***
67-قوربانام خان گؤزونه خومار باخان گؤزونه
گئنه سورمه چکیبدیر اؤولر ییخان گؤزونه
***
68-اوغلان ماشین آلیبدی منی گؤزدن سالیبدی
هر وقت منی گؤرنده منه چپ چپ باخیبدی
***
69-آق اوسته قارام واردی سینه مده یارام واردی
منی قووما قاپیندان دی منیم هارام واردی؟
***
70-حیطده حووض واردی اوستونده دوران یاردی
خیرین اولسون قاینانا او بویدا اوغلون واردی
***
71-پاییز یازدان یاخچی دی اؤردک قازدان یاخجی دی
تویدا بیر گلین گؤردوم واللاه قیزدان یاخچی دی
***
72-ماشیندا گؤردوم قیزی توتانمادیم تورموزی
آللاه قیسمت ائله سین اؤزوم آلیم او قیزی
__________________________________________________
پاورقی ها
1-این بایاتی از سعید توکلّی است
2-روایت دیگر:گوموشدن
3-روایت دیگر:من یار حسرتینده یم
4-روایت دیگر:اورکده
5-روایت دیگر:شیبرو لارین
6-دو روایت دیگر:آلیب،توتوب
7-یعنی از زمانی که در قنداق بودم،بدبختم،این بایاتی سعید توکلی است.
8-روایت دیگر:داغ باشیندا
9-اوره ک سیرفا دریورکی
