قالب شعر: مخمس
تاپوبدی گلشن خلقت صفا حسینه گوره
قبولیدور اولا هر نه دعا حسینه گوره
حسین سرآمد اولوب عشقین امتحانینده
شرف کلید شهادتدی آرمانینده
اونون دخیلیدی سلطانلار آستانینده
پیمبران اولوالعزم ،اوز زمانینده
اولوب بلانین الیندن رها حسینه گوره
حسین که من تانورام کائناته رهبردی
حسین که من تانورام آرمانی برتردی
عزیز فاطمه دی نور چشم حیدردی
اونی رسول خدا هامودان چوخ ایستردی
ایشیقلاناردی دل مصطفی حسینه گوره
او اللهی که گونون گردشین دایاندیرماز
بدون عشق حسین عالمی دولاندیرماز
حسینون عاشقینی حشریده اوتاندیرماز
حسین گر ایستسه اوت قاتلینده یاندیرماز
دونر بهشته جهنم آقا حسینه گوره
قویون آچوم سوزی دنیانین ابتداسیندن
وجوده هر نه گلوب خلقتین بناسیندن
تمام بهره آپارموش حسین عطاسیندن
وئروبدی فطرسه شهپر گئچوب خطاسیندن
باغیشلیوب اونی حتی خدا حسینه گوره
حسین اوز عاشقینی یار پاکباز ائلویر
وفالی نوکری هریرده سرفراز ائلویر
اونون حضورینه کیم گئتسه پیشواز ائلویر
کویر بیر یریدی ایندی عرشه ناز ائلویر
اولوبدی کرب و بلا کربلا حسینه گوره
او گون که دشت بلایه حسین علم وردی
عقیلهء العربه خیمه گاه غم وردی
وئروبدی ال اله عباسیله قدم وردی
او چولده ظلم و ستم نقشه سین بهم وردی
گئدوب او چولده گزر اولیا حسینه گوره
او کربلا که ملائکدی گونده زواری
باتوبدی اوردا حسینون سوسوز علمداری
گوزلدی گورملیدی وار صفالی درباری
فراتین اوسته بدندن دوشوبدی قولاری
دگوبدی پیکرینه چوخ یارا حسینه گوره
حسین یخیلموشودی پیشگاه دلبرینه
او دم شتابیله جبریل گلدی محضرینه
یارالاریندان آخان قانی یاخدی شهپرینه
سالوبدی سایه حسینون یارالی پیکرینه
گلوبدی نالیه اهل سما حسینه گوره
وقوع اولوردی قیامت یواش یواش اوردا
او وضعی کوفه لیلردن گوریدی کاش اوردا
حسینه نامه یازانلار آتوردی داش اوردا
الینده خنجری شمرین کسوردی باش اوردا
ائدوردی حضرت زینب نوا حسینه گوره
وروبلا اوخ اوخون اوسته یارالیدی بدنی
وئرولدی غارته فرمان سویولدی پیرهنی
داغیلدی چوللره قزلار،پوزولدی انجمنی
آپاردولار بلشینی،نعشی یرده یوخ کفنی
بوغمده ناله ائدور انبیا حسینه گوره
(متن کامل شعر در جلد پنجم ،،مراد عشق ،،میباشد)
