فرهنگی، هنری و ادبی

امروز : 25 بهمن 1403

پایگاه خبری شاعر

آچ گؤزۆن قۏی يوخودان، گۆللر اويانسېن، غزليم (حسین منزوی)

آچ گؤزۆن قۏی يوخودان، گۆللر اويانسېن، غزليم
آچ گؤزۆن قۏی باخېشېندان گۆن اوتانسېن، غزليم
گؤره بيلمز، گؤزهليم! آیدا، اوزوندن گؤزلين
آيا باخ تا که حسددن، پارالانسېن، غزليم
سن اۏلان يئرده، گۆلۆم! گۆل ندی؟ دور گلشنی گز
قۏی سنين باشېوا، پروانه دۏلانسېن، غزليم
چېخ چمن سيرينه، مدهوش ائله سرو و سمنی
قۏی آدېن، عطر کيمی باغدا، جالانسېن، غزليم
جلوه يۏخ گۆنده، نه گۆلده، سن اۏلان يئرده گرهک
دفتر حسندن، هر آد، قارالانسېن، غزليم
قالمېشام، قاشېوې، کيپريکلريوی – گؤزلريوی
قلميم هانسېنې وصف ائيليه، هانسېن؟ غزليم!
سنی آغوشه چکنده اۆرهڲيمدن دئيرم
کاشکی بودور زمان بوردا دايانسېن غزليم
يا دايانسېن، يا که هر لحظهسی، هر ثانيهسی
بير ايل اۏلسون، ايلی بير عمر، اوزانسېن، غزليم
سنی، هر کيم ديله چالسا، گؤرۆم، آغزې قوروسون
گؤرۆم آغزېندا، عؤمۆرکن، ديلی يانسېن، غزليم