غم یمه یاخشی یامان گون گچجک
هرکسه چرخ و فلک اوز قدی پیرن پیچجک
هم گدا هم ده غنی شربت مرگی ایچجک
گر عمل اولسا درست، پل صراطدان گچجَک
هله سن فکر الیسن قالمالیسان آی حاج آقا
ضعفادن بهره وی آلمالیسان آی حاج آقا
ورثه قللکینه سالمالیسان آی حاج آقا
حیف اولا دهریده سن آللانیسان آی حاج آقا
هره یه بیر دوشوب آت میدانی واردی چاپیری
بیریسی پول قاپیری، بیریسی جنسین ساتیری
برینه فرق ایله میر حلال حرامی قاتیری
بیریسی فتح الیوب قلعه نی پرچم ساچیری
بریسی بنگاه آچوب معامله جوش ویروری
بریسی اوردا دوروب بعضی سوزه گوش ویروری
بیریسی چوخدی پولی اوزگیده بورش ویروری
بریسی مغموم اولوب ، مین نفره فوش ویروری
هرکسی چرخ و فلک بیر دوز آتوبدی آشنا
بیرینه گولوب زمان ، مینیب مدللی ماشینا
بیرینین بوشدی جیبی ،گونده گزیر اوزباشینا
بیریسی ارثه گوره دیرماشیری قارداشینا
انقالابدان سورا گل خلقی سویان بانکلارا باخ
جای سازیالین ، ارز آپاران تانکلارا باخ
بعضی دلال بزنوب ، رابطه شیطانلارا باخ
گه یاتوپ گه اویانان موفته یییَن خانلارا باخ
ای خدا منظره نی حتما باش اوسته گورورن
هرکسین دردینی سن حتما اورکده بیلورن
مظلومون گوز یاشینی هرگونی گوزدن سیلورن
نیه بس دهریده بو ظالمه فرصت ویرورن؟
ویرگونن فرصتیوی شکی یوخوم قدرتیوه
هامیدان یاخش بیلنسن ، قربانام عزتوه
خلیل مرادی
